Aste betez, maiatzaren 28tik ekainaren 2ra bitartean, Artedramak eta Kultur Leioak elkarlanean antolatutako Kultur Maratilaz gozatzeko aukera egongo da, antzerki, dantza, bertso, musika eta performantzeak uztartu eta plazaratzea helburu duen euskara hutsezko programa anitzarekin. Adin guztientzako pentsatutako proposamenak ikusteko aukera egongo da aste kultural honetan, Kontakatiluren ‘Katilukadak’ umeentzako txotxongilo obra izanik egitarauari hasiera emango diona.
Hurrengo egunean,29an, Khea Ziaterrek Gloriaren kantua obra eszenaratuko du, maite ditugun pertsonak heriotzaren aurrean betiko agurtzearen garrantzian oinarritzen den lana, hain zuzen. Maiatzaren 30 eta 31ra begira bina proposamen aurreratu dituzte. Asteazkenean,’Hartu ez nuen deia’ Fredi Paia bertsolariak idatziriko eta 2011ko Café Bar Bilbao Antzerki Testu Sarien euskarazko atalean irabazle atera zen testuaren irakurketa dramatizatuari ekingo diote, Ander Lipus, Ramon Agirre, Ane Pikaza eta Ana Elordiren eskutik.Egun berean, Musergo taldearen doinu bereziez gozatzeko aukera egongo gauen aurreikusita dagoen kontzertuan. Ostegunean berriz, Dejabu Panpin Laborategiaren, aurten Donostia Antzerki Saria jaso duen taldearen ‘Gure bide galduak’ lanarekin batera, Maialen Lujanbio eta Erkiziaren ‘Txori mugariak’ muntaia ikusteko aukera egongo da.Ekainera begira, aurreneko egunean, T(a)rtean Teatrok ‘Larria, kutsakorra mendebaldekoa’ taularatuko du eta 2an, Haatik Dantza Konpainiaren ‘Errimak oinetan’ eta DJ Musika saioa burutuko da Kultur Maratila bukatutzat emanez.
