Autores: Dejabu Panpin Laborategia
70. hamarkadaren azkenetan. Orereta, Euskal Herria. Kattalin, Nafarroako herri txiki batetik Oreretara doa bizitzera, osabaren etxera, Donostian magisteritza ikasketak egiteko. Garai mugituak dira. Azken urteetan fabrika erraldoiak eraiki dituzte herri askotan, eta herrixka izandakoak «hiri» bilakatu dira urte gutxian. Franco hil berri, Euskal Herria aldaketa sakonak ari da bizitzen. Fabriketan gero eta ohikoagoak dira patroien kontrako liskarrak eta egoera politiko berriak herri mugimendu antolatu bati egin beharko dio aurre. Kattalinek euskararen aldeko mugimenduarekin egingo du topo eta haren bidez deskubrituko du mundu berri bat, lagunak, maitasuna, borroka, ideologia… Utopia, amets eta desenkantuari buruzko kontakizuna da Gure bide galduak. Gure memorietatik berreskuratutako piezekin sortutako gaurko ipuina.
